Egia besterik ez zela zure ahotik aterako gezurrik
Eskubidea ahotan hartuz eta ez eskuan
Zeure burua debeku guztien biktima egin nahirik
Kulpitutik bezala zintzaizkigun mintzo
Harria aipu zuk gartzelakoa ezagutu ez zenuen horrek gartzelak
Debekuz bakarrik osatuko balira bezala harria
Herrimindua sinesten dizugu baina exiliorik gabe
Kulpitutik oihu egia besterik ez zela zure ahotik
Eta hain goraki aldarrikatuz eskubidea egiaren
Berri ez genizun entzun ahotik
Gelditu ginen esku hutsik
Eta zazpi karriketako barrenkale barrenan
Topatzen bazaitut malmindurik
Errukituko natzaizu galiziano
Kenduko dizut mailuma eskutik
Non daude elkartzera altxa behar zuten igitaiak
Ingudean landuko zaitut burdin bizkaiko
Sufrikarioan ez zaitezen bizi
Idazten ausartu ez zinen poema ikaseraziko dizut
Haize-pilar harroa eginen zaitut
Balizko errotako teilatuan paratzeko
Berriro ere oilaritea jo diezaguzun
Egunsenti zurien kontra
Lumazko oskorrien kontra
© Koldo Izagirre