Bakarrik hil zinen Aresti hil bakarrik
Barkazioa eskatu gabe zeure koplak zuhurtu gabe
Eskertzen dizugu
Bakea eta gerra bereizteko baliatzen ez zaigun
Zeure kriselu itzalia
Orain egia esatea ez baita aski
Orain edertu egin behar da saldu
Eskertzen dizugu mea culparik gabeko bekatu hori
Gerra baino latzagoa da hau
Gerraondo kaburik gabea
Ez zintugun bihotz bakarreko poeta nahi
Eskertzen dizkizugu herrak eta errakuntzak
Gauzak aldrebes ikusteko adorea
Axularri kendu zenion hitz ederra oilarite
Eta zeuk eman zenion hatsa gorri
Eskertzen dizugu garaiz hil zinen Aresti lumazuritu baino lehen
Bakarrik hil zinen Aresti hil bakarrik
© Koldo Izagirre