Pistolek balakatuak ez dakigu
Balak zein begi ez dakigu
Edo bala edo harri edo leize izan zen edo urkabe edo haizto
Suntsituak bizien mundutik ez dakigu
Hilik ere ezin dizkit ekarri ur mehe honek
Azken oihuren bat ez dakigu
(Mire aberria oihu bat da
Nire aberriak ez du hitzik
Nire aberria txipia da
Ongi ezagutuko du ihesi dabilenak
Aberri guztiek izan behar luketen bezain txipia
Aberri guztiek izan behar luketen bezain mutua)
Deserritu zizkiguten hilen mundutik
Ez dute harresi zuri batek bildutako atsedena azken aberria
Haien ondoan dago nirea leizeen hondoan
Bide berriak bihurtzen diren bidezidorretan dago
Suntsitu diguten ororen oroimen ur mehea
Errotarriak mugitzearren baina ur zulatzaile
Mugak ezarri behar dizkiot eta ez nuke bakartu nahi
Nire aberria ez da tapia zuri batek babesturiko bakea
Hitza asmatu behar zaien aberrietan dago eta ez dago
(Euzkadi bakarra ez da nire aberria
Hitz bat)
© Koldo Izagirre