Argiak ez beste ditut maite
Gailurrak...
Hegalik gabekoetara ekarten
Nau lurrak
Oinez besterik ezin
Oinez eta ez airez
Nik bideak
Egin
Oinez eta oinazez
Nahiz hanka biok hautsi
Bidea ez baita bidazti
Ezin ninteke sasi
Guztien
Gainetikan bizi
Eskuz diet behar
Eskuz eta ez mokoz
Nik lagunei
Heldu
Eskuz eta estu
Datorkigun uholdean
Inor salba dadin
Ezin ninteke sasi
Guztien
Gainetikan bizi
Hitzez ditzagula
Hitzez eta ez txirulaz
Esatekoak
Kanta
Hitzez eta iltzez
Urretxindorrak ez baitaki
Torturaren dantza
Ezin ninteke sasi
Guztien
Gainetikan bizi
Larruz niezazuke
Larruz eta ez lumaz
Maitasuna
Froga
Larruz eta lurraz
Amodio garbiagora
Emateko urrats
Ezin ninteke sasi
Guztien
Gainetikan bizi
Besoz ohi baitira
Besoz eta ez hegalez
Hildakoak
Jaso
Besoz eta basoz
Bihur daitezen sustrai
Luizi honi eusteko
Ezin ninteke sasi
Guztien
Gainetikan bizi
Zutunik nahi nuke
Zutunik eta ez auspez
Urkabera
Etorri
Zutunik eta etenik
Diet egingo irri
Hodei honen azpitik
Ezin ninteke sasi
Guztien
Gainetikan bizi
Gainik gain nenbilke
Ai, hegaztia banintz...
Inoiz nahi ez nuke
Sasi
Guztion
Gainetikan bizi
Hodei honen azpiko
Lur gainera naute
Hegalik gabekoek ekarri
© Koldo Izagirre