ONIK HELDU ZIREN?

Papurtu da etortzeko geneukan denbora.

Hagitz laburrago denez itzultzean bira,

oihanerako puskak batu beharko dira

deliberatzeko aldiak baduen nora.

Latin otoitz zaharrek zioten ora et labora:

sugerloju estuak geure lepoan tira;

zer egingo dugu orain haiei begira,

belaunaldi berriei so, lilura ala aztora?

Zertan bihur poema otoitz, otoitza auhen?

Etorkizuna magalean izan genuen;

noiz egin zuen jauzi hurkoaren altzora?

Okerka, bagoaz, bide okerretan gora.

Ezin jakin atzoko gure pozak non dauden:

onik heldu ziren, orain goazen basora?