EZINIKUSIA

Itsuaren kondena edo pribilegio:

begiak erne izanda, ez da gauza bera

ninia bultzatzea izkinatik ertzera,

ukatzeagatik diosal edo adio.

Begiak nahikoa edan duela badio,

ez zaiola sartzen hurkoarenik etxera

ez bi eta ez hiru —irudi bat berbera

gehiago—, irentsia liseritzea zio,

senari kasu eginez beharko da joka:

ulertzen saia zaitez zergatik ezkerrera

doan lepoa, saihestuz begiraden poza.

Kuttuna zelako behin, eta orain kordoka?

Ez ote da hau ere ispiluen afera?

Harrokeriak egin du begiekin oka.