HAMALAUKOA

Rolls Royce auto bat da sonetoa, alajaina.

Errepidean koskarik gabe azkar doa,

diseinu perfektuena, barru erosoa.

Sano behartua liteke errima baina

garaiz aldatzen da, ez aspertzeko adina.

Kanpotik ez maite arren molde klasikoa,

poeta zaharren laztan antigoalekoa

eta maisu-maistren isuria eta zaina

sentituko dituzu han eseri orduko.

Ni noa gidari, ala neurtitza dut zaldi?

Tradizio ufadak fin dizu lagunduko.

Esku-eskueran dizkizu fortunatuko

biharrak atzo ereindako zazpi esaldi,

zazpi samuraien eran, ukaldiz ukaldi.