ERREKA

Hitz larriz, ibaia; minuskulaz, erreka.

Nola ezberdindu biak ez da garbi beti:

erreka zeharka liteke gutti-beheiti

harririk harri jauzika eutsirik oreka;

senide duelako, beharbada, areka.

Ezin hari begira larritasunik senti,

ezpada elkarren begietako ilinti

ilunetan gaur itoko ote garen kezka.

Errekaren xuxurla ala zurea dantzut?

Bakarka pizgarri badira, trentzatuta lar:

erreka ondoan oinez ezagutu zaitut.

Erreka gardenago da egiteko zurrut.

Ibaiak, mutis dagi; errekak, berriz, marmar.

Elkarrenak gara gaur; errekarenak bihar.