AUKERAK ETA ERREMEDIOAK

Antzezle, idazle, itsu-entzule, laguna:

entseguak maita, baztertu estreinaldiak,

prestaketa du onena gure jaialdiak;

totel eta neketsu, nekez josten duguna.

Ordea, finkatzen denean guztiz jarduna,

zentzua galduko du erabat gozaldiak:

aktorea kaiolan —akabo hegaldiak—,

antzokia da orain kutxa itxi astuna.

Ezpata izan aitzin, edozein metal gorik

patrikako sumendi izan nahi… Ferra lauhazka?

Gurpila balitz, hala nahita ausaz zernahi zorik?

Ezpata hotzak, aldiz, deus ez aldatzekorik:

unisonoak ditu aho eta gatazka.

Mirets, nahi bada: erremediorik ez dauka.