PLASTIDECOR

Zergatik txikitzen ziren batzuk horren azkar?

Beltza, urdina eta gorria txaparrito

bilakatzen ziren berehala; eta kito,

aurrerantzean gaua morez pintatu behar

eta usoak lilaz zeru horian zehar.

Gailen zena, halere, eztabaida metafisiko

gorena, haragi kolorearen betiko

paper gainean adierazi ezina… Belar

berde, pantera arrosa, baina gu, nolatan?

Zer margok izan lezake larruaren antza?

Horia laru, laranja lar, beti dudatan…

Sarri zuriaren alde erortzen zen balantza.

Berant jarri zigun margo-kaxa hutsak bistan,

haragiaren egia datzala tximistan.