MUXUA

Zigilatze arin baten ordezkoa sarri,

diziplina edo ohitura, diosala usu;

uki-dastan masailetik aldentzen den musu

gehiegi eman ote dizkiogu elkarri?

Izen-abizenekin, seinalatu, gogoangarri

izandakorik zenbat hauteman ahal dituzu?

Zenbat, larritasun-amildegien abisu,

kinkan dutenak bertikalitatea jarri?

Amu gabe, arrainak itotzeko atakan;

arnas gabe, listuaren menpeko zoriak

bi bizitza aise ipin litzake kolokan.

Errai denez, erraiei hika mintzo den mihiak

nola jostun-arrazoi ezkutukoak dauzkan,

isilpean lotzen ditu hilkorron hariak.