FOBIAK

Badakigu zein den onberaren teoria:

bizi duinki, deus gorrotatu gabe,

kokatu gure ondoan, bizitzaren alde

—gogortuko ez bailitzan mahaiko ogia—.

Aire zabala maitatzeko, klaustrofobia

zertan den jakitea ez ote da mesede?

Beldur zerrendak egitera ohituta gaude,

atsegin ez direnetan azkena: hobia.

Araknofobiak babesten gaitu amaraun

likatsuenetan erortzetik aspaldian;

urari izuak eginarazten digu arraun.

Aldarera gorrotoak, andere eta jaun!

Uste baino gehiago lezakete zorian

eragin. Gurtu, beraz, haiek: baietz biziraun.