NIRE BI AMONAK

Gazterik hil zen bata, bestea luze bizi;

aparte daude Andoain eta Andaluzia,

baina distantziak ez du aldatzen guztia:

seme-alaba aldra bat zuten biek hezi.

Artzain bertsozalea Joxepa, lehenbizi,

autodidakta abil bere kasa ikasia;

Adoración, arduraz zorrozten pobrezia.

Jakin nahi nuke bete gabeko zenbat gutizi

ote zituzten buru barruko barrunbeetan.

Bat ezagutu nuen firin-faran berritsu;

bestea, kontalari mutu argazkietan.

Hildakoak dira bizidunen begiko su

hauspotuak sarri oroitzaileen pozetan:

pizten zaizkizu egin gabeko galderetan

eta ezin duzu izan haiek bezain jakintsu.