SENAK EZIN ASERIK

Senak ezin aserik bazabiltza, bizirik

zauden seinale omen da, nonbait; hala ote?

Deliberoa hartzen duena ez ei da arlote

bilaketaren zirimolan kateaturik.

Asearen deliberoa gure da? Noiztik?

Izarren taupada barruan duen garrote

makur, zital eta lehergarri baten kolpe

ase ezina ez ote da gosea, aitzitik?

Kantu bati itsatsitako harrapaketari

gosetiak garelako, gosetien gose,

asea ospatzen dugu berriro egarriz.

Ate-orpo bat zeharkatuta, mila atalase:

kosk egiten diogunez koskaren tranpari,

aske izateak ere ezin gaitzake ase.