OESTEKO FILMAK

Zer egin sheriff izarra merezi izateko?

Zaldia ongi lotu, saloonera bero,

cowboy zarenez gero, ez zerurik espero

eta zaude gertu ezproiak noiznahi janzteko.

Kuxinekin egin muinoak, haitzezko:

“Eta hi, zeren bila habil hemen, forastero?”.

Jolas horretan, larunbat arratsaldero.

Fundizioko tximiniatik dator kezko

seinaleen segida, indio mutuena

—apatxeak salbaje, legezkoak bakero—,

gaiztoak aise bereiztera ninderamana.

Bilau bakoitzarekin kontu-kitatze bana…

Egiaz, film haiek ziren bizitza bezala:

erdia punteria, erdia hautsaren lana.