ALICE ESKAILERA MEKANIKOAN

Nola gauza apartak dituen aurrerapenak,

ezin hari bizkarra emanda luze bizi;

zorabio eragingo lioke Alice-i

bere kasa dabilen eskailera honenak.

Itxuraz ez ditugu gogoko sailkapenak,

baina aise nitzake lurtarrak bitan bereizi:

eskailera mekanikoan behera luizi

kamikaze presatien eran doazenak,

edo lasai arraio nor bere mailan,

garbi izanez hamabi dituela dozenak,

binaka igoz doana ez dela abantailan.

Errentarik ba ote da batere abailan?

Adar gardenak ditu datorkigun zezenak;

eztena bizkarrean, apartatzen ez denak.