ZUMETA

Gauzak urratu eta harramazka eginez

datoz mihisera benetako koloreak:

kimika bortitza, buztin bizien oreak,

pultsua bor-bor, lerrora ekarri ezinez.

Ezina margotu eta ekina eginez,

izenburu bila natorren babaloreak,

erail beharko ditut orbanen amaordeak,

Zumetaren suak amatatzerik ez denez.

Zuk arrazoi literaturaz mesfidatzean:

mantxen zurrunbiloa du zinez amoreak,

ez du onartzen ostentzerik lerro artean.

Bridatu ezin den eskumuturra airean,

petaloz petalo ulu dagiten loreak:

zuri esker daukagu Guernica bat etxean.