EGUBERRI GOIZA

Oturuntza biren arteko isiltasuna.

Amaiera ttipien hausnarketa giroa:

beste astebete eta urte hau badoa,

bi mila urteri gehituz bere oihartzuna.

Aurtengoa ezberdin, ala aspaldi entzuna?

Lekuko izatearen pribilegioa,

pairatzearena higadura, arrastoa;

galerak zenbatuz berpiztearen fortuna…

Labeko beroa eta terrazako hotza,

Vivaldiri diogun gorroto eta mira:

lau urtaroen hizkuntza ez zaigu arrotza.

Herdoildu da leihoari eusten zion gontza.

Txakur-belarria duten urteak badira,

eta orok darama bere hezurra hobira.