BESTE BAT DA EGIA

“Ez zara deus aldatu” diotsut eta, hara,

beste bat da egia: aldatu garelako

darraigu bidean egur bila sutarako;

ez dira atzokoak pisua eta otzara.

“Ez zara aldatu” esatea krudela da,

baita egia balitz ere, zu bezalako

betigazte bat amildu litekeelako

hilezin direla uste dutenen sortara.

Bai: aldatzen segitzeko aldatzen garenez,

hartu elkarrizketa utzitako lekuan,

gaurko zita hau atzoko irribarre batez

balizatu arte deus ez baitugu eskuan.

Aurreratzen da ezer dakiguna esanez?

Bizitza da bizitza, mudatzen den puntuan.