Bitsa eskuetan
Bitsa eskuetan
2010, poesia
96 orrialde
978-84-92468-23-2
azala: Arrate Rodriguez
Miren Agur Meabe
1962, Lekeitio
 
2013, nobela
2000, poesia
 

 

LOCUS AMOENUS

 

                        Bakardadea bera ere bada ekintza. Zergatik ekin?

                                                                          Vladimir Holan

 

 

Maskor-kixkirriak, urtero lez,

oldean heldu dira hondartzara.

Posible dirudi bizitza sintesian ikustea

lubakia hazi bitartean.

 

Txakur bat olatuei zaunkaka.

Saski batetik laranja bat pirritan.

Posible dirudi oihalak goratzea

publikoari itxaron barik.

 

Urriaren hogeita bosta, zapatua.

Semea bere kabuz hirian.

Posible dirudi gauzen ordena

esku bakarrarekin atontzea.

 

Hustasun hau ez da besterik bakoa, ez da kasuala.

 

Ai, lagunok! Ardo-kopa altxatzen dut

baratzeko hormei begira

eta kardu-belarra bezain arina naiz sentitzen.

Erreturak errautsak utzi ditu lurrean,

haizeak bekokira dakarkidan polen arrea.

 

Bitsa, ez dut besterik eskuetan.

 

Sagarrondoaren adarrak krak egiten duenean

aingeru hautsien barrearen soinuaz,

sinesten dut posible dela oraindik ere

zentimetroren bat haztea,

panpinekin berbetan segitzea

eta ahaztea.