Bitartean heldu eskutik
Bitartean heldu eskutik
2001, poesia
104 orrialde
84-95511-48-7
azala: Ikeroker
Kirmen Uribe
1970, Ondarroa
 
2016, nobela
2012, nobela
 

 

BIDAIA KAIERA: ASILAH

 

Asilah-ko talapean itsasoa.

Harkaitzetan oinotsak.

Itzal artegak harat-honat.

Hainbat gizon-emakume fardelak aldean.

Lipar batean desagertu egin dira,

sugandila ikaratiak balira bezala, ihesi.

 

Saidek hautsi du isiltasuna:

«Hegoaldeko nekazariak dira.

Europara iritsi direla uste dute.

Horregatik dabiltza horren isilean.

Tarifa edo Kanariar irletako kostatik

hurbil daudela esaten diete bateletako lemazainek,

itsasoan bira eta bira ibili ondoren.

Lehorrekoak izaki ez dira konturatzen

Marokoko uretatik atera ere ez direla egin,

ez dakite abiatu diren lur berberera iritsi direla,

atzera».