Bitartean heldu eskutik
Bitartean heldu eskutik
2001, poesia
104 orrialde
84-95511-48-7
azala: Ikeroker
Kirmen Uribe
1970, Ondarroa
 
2016, nobela
2012, nobela
 

 

SOLDADU MONGOLIARRAK

 

Bigarren Mundu Gerra bukatzear. Italia.

Soldadu mongoliarrak

bi aldeetan borrokatu ziren;

sobietarrekin hasi, gero alemaniarrek preso hartu

eta hauen armadan sartzera behartu zituzten.

Orain alemaniarrek atzera egitean

abandonatu egin dituzte mongoliarrak.

Etsiak hartuta, kamioi baten jabe egin dira.

Biharamuneko ihesari adorez ekin baino lehen

erabaki dute apirileko gau epela profitatzea.

 

Ez da erraza izango sorterrira itzultzea

kontinentean barrena. Ezinezkoa ia.

Jopu dira galtzaileentzat,

traidore irabazleentzat.

Ebatsitako likore botiletatik dzanga eginez

kantuan aritu dira gau osoan.

 

Goizalban kamioia abantean jarri,

atzealdera igo eta

Po ibaira amilarazi dute.

 

Han ito dira denak.