Funtzionariaren txostena
Ezin da fitxatu hainbeste jendetza
dio funtzionariak,
kresala bezala da
eta arrainak bertan.
Ezin ditugu neurtu
hainbeste bihotzeko pilpira.
Buruko mina sortzen digute
gogo klandestino horiek
hemen bilduta,
malko ilegal horiek
hemen isurita,
oihu eta hitz mingotsak,
garaipen hitzak,
hemen elkartuta.
Buruzagi bati azken agurra,
herri basati honen omenaldia.
Aintzinako ikurrak ditu
bandera estrainio horrek,
lurraren hasiera
eta kultura zahar baten markak:
sugea eta aizkora,
sinbolo ezkutuak,
jarri dituzte agerian
jendetzaren aurrean,
narrastia giderrean kiribilduta;
eta oraingo garrasiek
itotzen gaituzte,
pilpirak, gogoak, malkoak, hitzak
fitxatu ezinik.
(Txomini emandako azken omenaldiari buruzko poema,
Che-ren heriotzaren hogeigarren urteurrenean).
© Joakin Balentzia