Jaietan zebiltzan
Jaietan zebiltzan: jantzi berriak,
diru zoro piskat poltsikoetan,
gorputz gazteak,
eguzkia eta gau beroa.
Jaietan zebiltzan herritarrak
urtero bezala.
Egun horietan familiako gorrotoak
apaltzen dira nolabait,
eguneroko penak itsasora jaurtikiz,
lantokiak, auzitegiak eta gartzelak ere
erabat hertsirik.
Jaietan zebiltzan eta herriko enparantzan
jaizaleak elkartu ziren,
aberria bihotzean ere.
Baina atzerritar armatu malerusak
hara agertu ziren,
hegazti harrapariak,
eta jaiak akitu ziren;
ustekabean harrapakariak harrotu
eta beren ehizarako alderdi hura
oro zelakoan,
hatzapar odoltzaleez agindu zuten.
Jaietan zebiltzan herritarrak urtero bezala.
(Iruñea 78-Orereta 83 Noiz arte?)
© Joakin Balentzia