Susa-ko liburuak

CUL DE SAC

Gizaki gehienen antzekoa zen bera;

besterik bururatzen ez zitzaionean baino

ez zuen jainkoen aholkua onartzen.

Gábor Thurzó

Ez zegoen beherago egiterik animoan eta eskaileretan.

Zure aurpegia ezaguna egiten zait, bota nion.

Askori gertatzen zaie: Arthur Rimbaud naiz, esan zidan

Rimbaud poeta ala trafikatzailea?, ausartu nintzaion.

Biak, erantzun zidan.

Hunkitu egin ninduen, aitortzen dut.

Hain tipo serioa ematen zuen

aguafuerte eta grabatuetan

eta hantxe zebilen morroia, hilkor arrunta bailitzan

absenta trago batzuk borrokatzen.

Nire aurpegia galdera ikur eta puntu suspentsibozko

bozeto ikaratua zen.

Irribarre egin zuen, mahasti lurperatuak,

bere altxorrak,

seinalatuz.

Bai, hau duk sasoi baterako lekua, esan zidan,

iritsi haiz.