EZ GINATEKE HONDORATUKO
APARRAITZEZKOAK BAGINA
Bi ertzak gorrotatzen dituen zubian
harrapatuta dagoenari
«ez etsi» esatea alferrik da, ordea.
Edo lo egiten duzun oheharriari
piano zaharra bailitzan
izaren mozorroa kentzea.
Ohartuko zara: hainbeste gauren ondotik oraindik
zure ametsen higadurak ez du hilobiko
izkribua ezabatzerik izan.
Insomnioarekin buruz buruko borroketan
burkotzat duzun errekarriari, gaueko korronteak
arrain baten biribildura zizelkatu dio, gehienez.
Beha gerora ere bidea zerk oztopatzen duen:
harrizko arrainaz baino
kamustu ahal izanen ez dituzun amuen galderak
zubiak arbuiatzen dituen
ertz bietan.
© Harkaitz Cano