GORPU LAPURRAK
Ez ginateke hondoratuko
aparraitzezkoak bagina, Donald Siegel.
Egunero hortzak garbitu ondoren
ematen dugun muxuari
hamaikagarrenean hartuko ez bagenio
gorpua lapurtu diotenaren zaporea.
Maite dugunaren irribarrea hilzorikoen sehaska
ez balitz.
Ez da gure errua.
Guk beti maite dugu pertsona bera
gorputz ezberdinetan izan arren.
Baina maite dugun jendea aldatu egiten da.
Baina hondoratuko ez bagina, Donald
eroriko ez bagina
ez genituzke hondoan daudenak ezagutuko.
Ez genuke elkar ezagutuko, Donald
aparraitzezkoak bagina.
© Harkaitz Cano