Bildumaren zerrendara itzuli


LIBURUARI BURUZKO
KRITIKAK

EROSI LIBURUA
E-BOOK FORMATUAN

AZALA

 


 

ZHUANG ZHOU-REN AMETSA

 

Arratsalde osoa

idazten eman ondoren

lotara noa

eta idazten jarraitzen dut

ametsetan.

 

Orduan idazten ditut

agian

poemarik ederrenak

baina esnatzean

ez ditut

jada gogoan.

 

Esaldi haiek

joanak dira ordurako

lurralde urrunetara,

munduaren

beste puntara.

 

Beste idazle batek

—Polonian, Turkian,

edo Malaysian beharbada—

jaso dituela

sinistu nahi dut.

 

Horregatik agian

identifikatzen garela

gure antipodetan

idatzi zituzten

testuekin.

 

Zerbait gurea

sumatzen dugulako

lerro, hitz

eta arnasaldi haietan.

 

Posible ote da

nik idatzitakoa ere

lurralde urrunen batean

lotara joan eta

ametsetan idazten

jarraitzen duen

norbaiten hitzak izatea?

 

 

 

© cc-by-sa Pako Aristi

 


www.susa-literatura.eus