EURI TANTAK

Eta bidean akituta

aurkitzen zarenean

jakin ezazu

badirela hiru leku

bakearen pausatoki,

haiei begira

inoiz aspertuko ez zarena:

sua,

itsasoa

eta maitearen begitartea.

Sua, izartegia margotzen.

Itsasoa, infinitua iratzartzen.

Maitea, ilunabarra argitzen.

Hiru leku horietan biltzen da

gizakiaren obsesio nagusia

—kontzientziadun izan aurreko

batasun uste oparoa—

baketu dezakeen

sentipen abaroa.

Baina erne:

Sua, Itsasoa, Maitea

lipar batez ere

haserraraziz gero

enbataren basakeria oro

erakuts dezaketen

leku berberak

baitira.

© cc-by-sa Pako Aristi