AGUR MODUAK

kosmonautak oinez ibiltzen erdi ahaztuta

bueltatzen ziren espaziotik

itsas gainean pausatu ontzien barruan,

gauzen esanahia atxiki nahirik

guk hodei artean galtzen genuen begirasuna

etxeko atea giltzaz ixten hasteaz batera

ugaldu ziren herrian ostatuak, eta orain

abisatzeke itzali dute mundua

hitzartuko dira berriro diosal errituak,

izurriak ostu gorpuek gordeko dute

zorion zantzurik

perretxiko atomiko naifen antzera

zurkaizteko hurrena

haurren geletako enpapelatuan, esaterako

hiru pertsonari egin diet lagun hil aginean

eta bakarra erditu da alboan ninduela,

datu guztiok ordea kukuturik behar dute

demografoen estatistika tauletan

pipiak jandako malkoen ondoan

animalia erdi aspertua

erakusten dit ispiluak egunero samar:

hazpegi kaukasiar bat izu printzekin

uste dut orain artean gurtu ez dugun

zera basa bat ari dela hazten nonbait,

eta ez da ezer pertsonala baina

berriro inoiz hain humano izaten

ikasiko dugun edo ez

jakin nahi dudan ere ez dakit jada