SAGARRA JAN BITARTEAN

zer musika joko ote du haizeak

ozeano erdian landatu

zuhaitzen hostoekin,

batzuetan egiten dut

hari adi jartzeko ahalegina

eta entzutea iruditzen zait

inoren haurtzaroko aireak

egun egin berri berdintsu bat

eskaini dit okindegiko andreak

eta aparteko pozik gabe

baina nik egin diot hartu,

joko etxeen iragarki

eta kriptomoneten

mezuen kitzikapean

bere bidean badoa goiza

beldurrez nago

jakin gose urduri batez:

agian hauxe izango da

abagune aproposa

edozein irabazi asmoren aurka

munduan diren

paradisuetako hesien gainetik

antolatzeko ihes masiboa

nork daki zer etorriko den,

hala ere eder iritzita

dirua inporta ez zitzaigun

arratsalde haietan

gauza txikiengatik

nola sufritzen genuen

ez nuke egundo ahaztu nahi

landuraren beste aldean

elkar besarkaturik

asmatzera egiten genuen

etorkizun haren puskak

ez dakit ez garen hasi

bigarren aldiz

bizitzen orain