Landura
Landura
2022, poesia
96 orrialde
978-84-17051-92-1
Azaleko irudia: Xabier Gantzarain
Jose Luis Otamendi
1959, Azpeitia
 
2019, poesia
2014, poesia
2007, poesia
2000, poesia
1999, narrazioak
1995, poesia
1990, poesia
1987, poesia
 

 

BARRUTIK

 

 

gauza asko ikasi dugu denbora gutxian:

oinetako dendak ileapaindegiak

bezeroak galtzen hasi eta

abisu eman gabe etorri da shock egoera,

ondoren ezinezkoa dirudi norabidea ituan jartzea

 

lehentasun bihurtu da ekonomiaren koma eragoztea,

aldi honi bere haurrak nola hazten diren

ikusteko grina apaldu ahala

gobernuz kanpoko boluntarioen esku utziko da

piramide demografikoetako sarkofagoak arpilatzea

 

elkartasun proletarioak ihes hodi itoa dirudi

merkatuen joera izutuarentzat,

gaitza hurrengo belaunaldian pozaren

eroale asintomatikoek zabalduko dutela espero da

 

frontoiko artekarien gangar hotsean

jaulki ditut sehaska kantak geriza baretze aldera

hala ere nago egundainoko gure irabaziak

ongizate-gulag gotortu hauexek direla

 

gauza asko egiten dugu orain leiho-balkoietan

—ahaztu egingo zaizkit idazten ez baditut—

ez dakit gero zein hizkuntzatan azalduko dugun

zertan den hemengo diglosia emozionala

 

orain gehiago dakigu, kaleak hustu eta

sapailoetako frankotiradore bilakatuta

nik ere txaloka ekiten diot edozeinen aurka;

ari gara ikasten batak bestea ukitzeke

elkar nola maite

 

gainerako gertagarrien aukera baztertu gabe

krisi honen ostean, zoragarria litzateke

bakoitza berea ez ezik

beste inoren itzala ferekatzeko gai izatea