Bildumaren zerrendara itzuli


LIBURUARI BURUZKO
KRITIKAK


 

BLAKI

 

Blaki omen da bere lagunik leialena,

hori esan dit lehen Mariak.

Berak ba omen daki

Blakik ez duela inoiz traizionatuko,

Blaki ez da gaiztakeriak egiteko gauza,

ez da batere extrabagantea,

ez ditu haserrealdi ulergaitzak izaten,

ez du atzo «seguru» eta

gaur «ez dakit» esaten.

Ez ditu, ezta ere, justifikazio

absurdu eta sinesgaitzak asmatzen.

Makila bat bota ezkero

ziur da haren bila joango dela.

Blakik ez du egun txarrik izaten,

baina ez pentsa tontoa denik

esan dit Mariak.

Ordu biak aldera

sukaldean sartzen naizenean,

Blaki beti gerturatzen zait

buztana alde batera-bestera

badakielako jateko garaia iritsi zaiola.

Txakur hau ez da batere tontoa,

txakur honek ematen dit

beste inork ematen ez didan zoriona.

Hori guztia esan dit Mariak

 

Baina nik agintzen dizut

zu maitatzen zaitudala gehien oraindik.

 

 

 

© cc-by-sa Beņat Sarasola

 


www.susa-literatura.eus