PETER PAN SINDROMEA
Ume garaiak oroitzeko modu asko dago.
Batzuek trasterotik mekano zaharrak
berreskuratzen dituzte, eta puzzleak,
100 piezatakoak, 200ekoak...
Eta iruditzen zaie ez direla
puzzle horiek atzera osatzeko gai,
metalezko xafla horiekin
helikopteroak eraikitzeko gai.
Euren miseria ikusten dute aurrez aurre.
Beste batzuk ikastola zaharreko
patiora joaten dira eta begi-bazterrez
porteriei behatzen diete.
Edo supernintendoa pizten dute berriz eta
atzamar lodi gorrituez oroitzen dira,
mandoari indarrez sakatzez minberatutakoak,
eta horri bizio deitzea txistea iruditzen zaie orain.
Argazki bilduma zaharrak hautsetatik atera
ezein garai iraganeko hobea dela konturatzeko.
Badira jostailu dendetara
lantzean behin sartzen direnak ere,
jostailu berriak begiratzen jarduten dute,
eta bat-batean konturatzen dira
zenbat zahartu diren denbora gutxian.
Nik uzkiko ileak kentzen ditut
umetasun pixka bat sentitzeko.
© cc-by-sa Beņat Sarasola