ZORIA
Kasualitateak ez gaitu laguntzen, maite,
eta itxura guztien arabera aurre-
rantzean ere ez gaitu sobera lagunduko.
Zoria ere, ez du ematen gure alde dagoenik.
«Eta guri zer?» esaten dute astroek.
Yin Yang-a bezala, haiek ere
ez omen dira ondo moldatzen gurean.
Onar dezagun, Goliaten kontra
mila bider borrokatuta ere
ez genuke sekula batailarik irabaziko.
Guregatik balitz, maite,
ametsak ere aurreztuko genituzke
humanitatearen 673075339130 kontu korrontean.
«Uztazu, igual da, ez du axola, beste batean» eta abar.
Iruditzen zait dena dugula gure kontra.
Ez dakit baina, batzuetan pentsatzen dut
agian horregatik izango garela hain koldarrak, maite.
© cc-by-sa Beņat Sarasola