ABERATS
Ez zaigu aberasteko asko falta.
Egon hor, pazientzia apur bat,
gure aurreikuspen moderatuenak
betetzearekin nahikoa izango dugu.
Ez alde egin oraindik, ez etsi,
ez dut zoria aipatuko,
izan konfiantza nigan.
Eta gero ez da inor konturatuko,
zin dagit ez duela inork jakingo.
Nahi duzuna egingo dugu,
disimuluak dena estaliko du,
joan gaitezke Jordaniara,
Singapurrera, Brunei aldera,
irri egingo dugu hango sultanaren bizkar
eta mundu zabaleko xaloen omenez.
Kasino eleganteen albotik pasatzean
ez gaitu ezerk liluratuko,
guk betiko alkandorak jantziko ditugu,
baita tirantezko galtza laranjak ere.
Ez ditut zuk erregalatutakoak baztertuko,
ez ditugu gure ametsak arbuiatuko.
Benetan, itxaron apur batean,
ez zaitez errenditu oraindik.
Zin dagizut:
ez zaigu aberasteko asko falta.
© cc-by-sa Beņat Sarasola