Kapital publikoa
Kapital publikoa
2014, poesia
104 orrialde
978-84-92468-64-5
azala: Xabier Gantzarain
Jose Luis Otamendi
1959, Azpeitia
 
2019, poesia
2007, poesia
2000, poesia
1999, narrazioak
1995, poesia
1990, poesia
1987, poesia
 

 

LAU MILIOI URTE BARRU

 

lau milioi urte barrurako

iragarri dute munduaren azkena

zientzialari lagunek

ordura arte erre ez den guztia

kiskali egingo da

hala galduko omen dira

hainbeste gizalditako lorpenak:

adiskidetasuna

amodioa

elkar hartzea

gupida...

 

lehenagotik zerbait bai bageneki bezala

gara galdu-gordean abiatuak

akabu horri ihesi:

presaka doaz haurrak gurasoen beso artera

belozitateak limurtzen gaitu jendea

beste planeta edo aro baterako txartela

eskaintzen digula autoak gauak ardoak...

 

hurkoaren begietara so

azken minutu hartako argazkiak

ikusten nagoelakoa datorkit

inon ez diren albumetan...

ezin dugu lau milioi urte itxaron

bizirik garenon poza

galtzea eragozteko

 

lau milioi urte barru

iragarri dute munduaren azkena

atzo jakin nuen berria eta

kezkak hartu nau:

semeari telefonoa jo

arropa lehorrak jaso eta

bart lankide bat kaleratuko

zutela gaztigua eman ondoren

sobera haserretu ez izanak

behea joarazi dit

 

ezin dugu lau milioi urte itxaron

presa handia dago...

atzo jakin nuen berria eta

atzera kontaketari

dagoeneko jan diogu

egun bat:

munduko gupida

amodioa

elkar hartzea

adiskidetasuna...

 

hainbeste dira egitekoak eta

lau milioi urteko epea hain labur

bizirik garenon poz hau

gaur bizitzeko

lau milioi urte

hain da denbora gutxi

kapitala eraitsi eta

bizi izan garenon poza

galtzea eragozteko