Kapital publikoa
Kapital publikoa
2014, poesia
104 orrialde
978-84-92468-64-5
azala: Xabier Gantzarain
Jose Luis Otamendi
1959, Azpeitia
 
2019, poesia
2007, poesia
2000, poesia
1999, narrazioak
1995, poesia
1990, poesia
1987, poesia
 

 

MILITATU

 

egunero ematen dut izena zure bihotzaren alde

eta berehala datozkit etzanda behetik gora

ikusitako arbolapeak hostoak hodeiekin dantzan

eta gurea edo beste edozeinena izan

maitasunagatik antolatu elkarretaratzeak

auto karabanak giza kateak herri harresi eta

banakako manifestazio erraldoietan

parte hartzen ari naizela etortzen zait

militantzia erabateko eta atzera ezinean

 

estrategia eraginkorragoak

inguruabarrei begira taktikoki hobeak

aztertu eta arakatzen ditut nonahi:

aurreko eta ondoko belaunaldien artxiboan

nazioarteko biltoki eta gorputzari itsatsi huntza artean

 

ekintza zuzena desobedientzia asmoak

elkartasuna ordaintzen ditut ahal neurrian

eta zure bihotzaren alde

egunero jotzen dut neure burua errudun

hurrena ere etzandakoan behetik gora arbolapeak

hostoak hodeiekin dantzan ikusten ditudanean

edertasunaren pilpira zeri egotzi izan diezaiodan