Kapital publikoa
Kapital publikoa
2014, poesia
104 orrialde
978-84-92468-64-5
azala: Xabier Gantzarain
Jose Luis Otamendi
1959, Azpeitia
 
2019, poesia
2007, poesia
2000, poesia
1999, narrazioak
1995, poesia
1990, poesia
1987, poesia
 

 

GERRA TXIKIA

 

XXI. mendeko biztanle ondo-bizia naiz

gaurdaino ezein biktimismotan jausteko

arrazoirik izan ez dudana

eta ongi dakit munduaren azalean

pikor koskorra izatera baino ez garela helduko inoiz

hala ere apur bat harritu egiten nau ikusteak

nola erretiratu diren nazioarteko begiraleak oro

aditu eta bakegileek nola utzi gaituzten

geure indar txikiko gerran egosten:

jendea handizka daramate preso

legez ezarritako iritzi isolatze edo amodioak

naturaren epaitzat onartuz

eta berriro hor dira hildakoak

 

eragozpenik ez dut aurrera egiteko egunerokoan:

gogora datozkit nire zorionaren errutinak

sortzen dituen albo kalteak bazterketa miseriak

baina ez nago maite dudana ukatzeko

torturapean ez bada

edo akitu egin delako maitasuna...

eta berriro hor dira hildakoak

 

uste dut hori guztia etor daitekeela

XXI. mendeko biztanle ondo-bizia naizelako:

gaizkileen adiskide jo nazaketela

eta kalte larrien eragiletzat

hartuko nauenik ere ez da faltako

—hainbeste dira aurrekariak—

hala espetxera daramate jendea

eta berriro hor dira hildakoak

 

keinu eroekin espantuka

gerra honen luxuzko ertz batetik eskatzen ditut

nazioarteko begiraleak kazetariak kamerak

behin eta berriz ez dezagun gure burua kondenatu

geure buruaz erditzera

munduaren aspergarri

 

eta batzuetan

anonimotasun zoragarrian murgildutako

herri libre baten ametsak iratzartzen nau oraindik

—handizka zapaldutako

intentsitate txikiko nire aberrian—

eta betiko hor dira hildakoak