Kapital publikoa
Kapital publikoa
2014, poesia
104 orrialde
978-84-92468-64-5
azala: Xabier Gantzarain
Jose Luis Otamendi
1959, Azpeitia
 
2019, poesia
2007, poesia
2000, poesia
1999, narrazioak
1995, poesia
1990, poesia
1987, poesia
 

 

OSTENDUON MINTZOA

 

 

                                                  Joxean Lasa eta Joxi Zabalari

 

 

zenbat orduz zenbat egunez

ostendu ginen

noizko ezkutalariak gara

gaur hemen agertu garenak

noizko desagertuak dira

bila gabiltzanak...

zein erbik zein eper izutuk

ekarri ditu honaino

duela 29 urteko ehiztariaren pausoak:

haizeak badu akordurik

orduko ahotsak badira gaurkoen kide

irratiz mintzo direnean...

non geunden orduan baina

non gaude hemen gaudenean

inoiz izan al ginen han

eta noiz gaude orain

 

ostendu ginenok

ba al genekien nondik

ba al genekien noiztik gordetzen ginen

zer pentagrama osatzen dute

esaten ausartzen ez garen horiek guztiek

orduko haizeak

gaur egungo hostoak zafratzen ditu itsas aurrean

inork behar izan gintuenean ordea

beti ez geneukan gerturik odola

eta batzuetan kosta egiten zaigu orain

kausa ederren alde hitza ateratzen

ezin izaten dugu lotsa izpi bat gabe

ogia besapean ekarri

ahora eman behar zaigu edateko ura

ez dakigu izapideak eta denbora ondo nola bete

 

urteotan guztiotan

epeka ostendu izan garenok

zerk jarriko gaitu orain herrira bidean

nola aurkituko dugu etxeko sua

zer txara artetan jaikitzen da dolu kantua...

noizbait itxiko da heroien aldi hau

jendea elkarren ondoan biziko gara

eta arrapostu emango diogu

luze armairu zokoan utzitako arrazoi sailari:

garena eta ez garena agerian jartzeko

tenorea helduko zen agian

daukaguna eta ez daukaguna

erakusteko ordua

bestela zerk jarriko gaitu herrira bidean

non aurkituko dugu etxeko sua

nola igarri zer txara artetan jaiki den dolu kantua

 

seguru asko desagertu dena izango da

desagertu dela ez dakien bakarra

seguru asko ezkutatu dena da

aro bat amaitu dela jabetzen azkena...

zein gerlatan desagertu ziren

zein gelatan ostendu ginen gu