Kapital publikoa
Kapital publikoa
2014, poesia
104 orrialde
978-84-92468-64-5
azala: Xabier Gantzarain
Jose Luis Otamendi
1959, Azpeitia
 
2022, poesia
2019, poesia
2007, poesia
2000, poesia
1999, narrazioak
1995, poesia
1990, poesia
1987, poesia
 

 

ETA BIHAR

 

zer egin behar dugu

ohorearen lurralde galduarekin

noiz gorpuztuko dugu

agian inoiz inon ezagutuko ez den

erresuma estrainio hori

non mamituko da

noren begietan zein bizkarren gainean

 

zer egin behar dugu

xuxen zer den esaten asmatzen ez dugun

jendearen duintasunarekin

bizi izandakoenganako begirunearekin

zelako doinua jarriko diogu

mundu honen ardatz karranpatuari

nola babestuko dugu jendearen sumina

nola gordeko dugu itxaropena

lizundu gabe

 

erne daitezen behartzen garenean

nondik hurreratuko gatzaizkio

elkarren bakardadeari ordu egokian

barne muinak sobera urratu gabe

gogo-bihotzak zapuztu gabe

neurri doian

 

zer egin behar dugu inor ez ahazteko

zer egin behar dugu bizitzaren edertasunarekin

eta zer egingo dugu maitasunarekin

garaipenaren biharamunean