Kapital publikoa
Kapital publikoa
2014, poesia
104 orrialde
978-84-92468-64-5
azala: Xabier Gantzarain
Jose Luis Otamendi
1959, Azpeitia
 
2019, poesia
2007, poesia
2000, poesia
1999, narrazioak
1995, poesia
1990, poesia
1987, poesia
 

 

HORIEK GUZTIEK

 

eta nik bezala

zer egiten dute ni horiek guztiek

deblauki ortzi zolara jausten direnean

nola moldatzen dira iturri agortuan

arrazoiak bai baina erarik gabe

gertatzen direnean

nondik bilduko dute kemena

ni horiek guztiek

zu joaten bazatzaizkie

 

eta nik bezala

zer egiten dute ni horiek guztiek

leinu ilun baten abiaburu eta hatsarrea

eurak direla jabetzen badira

zelan egingo dute aurrera

sortu ziren hizkuntza atzendu

eta besterik ikasi ez badute

zer egiten dute ni horiek guztiek

oinek behera egin eta

behe gainak eusten ez badie

 

eta nik bezala

ni horiek guztiek zer egin behar dute

mendeen mendetan

sekula ez direla saldu

ez dutela amore eman uste bazuten

eta goitik behera tronpatu badira

 

eta nik bezala

zer eginen dute ni horiek guztiek

zu joaten bazatzaizkie...

eta geratzen badira bakarrik

kapitalarekin aurrez aurre

(harridurazko senidetze zail batean

elkarri begiratu agian)