FOSFORO ZURIA
Iñaki langabea eta Izaro bekaduna
ez dira komando-kide izan,
haiena ez da borroka bera.
Material trukea egin dute,
baina horrek Izaro gaizkide
besterik ez du bihurtzen.
Iñaki langabeak eta Izaro bekadunak
ez dute helbururik partekatzen,
ez daude hotzik arrazoi berberarengatik.
Sua izan da elkar ulertzeko elementua.
Abenduan Iñaki langabeak fosforo zuria
proposatu zion Izaro bekadunari.
Bai, Izaro bekaduna ohartzen da
urez itota ere berpiztu egiten dela garra.
Baina ezpainak zartatzen zaizkionean
ados egoten da fosforoa erabiltzearekin.
Iñaki langabeak eskatu dio, ez dezala aipa
Arma Kimikoen Debekurako Erakundea,
ezta ere azalean dituzten erreduren jatorria.
Irtenbide bakarra Iñaki langabeak alde egitea da.
Nolanahi ere Izaro bekadunak hotzez jarraituko du
bere erakundearen (Iruñerriko Mankomunitatearen)
egoitza nagusiko berogailua konpondu ezean.
© cc-by-sa Hedoi Etxarte