HARATEGIKO SOLASALDIA
Musika talde bat zeukan OD biolinistak.
Iruñerriko Hitzak egin zion elkarrizketa
bateko galderari honela erantzun zion:
«Zuzenean jotzeko diskoa atera dugu».
Asteazken batez SP publizista Iruñean zegoen,
OD biolinista euskaldunaren jaioterrian.
SP publizistak OD biolinista
harategian ikusi eta galdetu zion:
«Zertarako atera duzue diskoa
zuzenean jotzeko baldin bada?».
SP publizistak ez zion beste galderarik egin.
Bazuen musikarien gaineko beste zalantza bat,
baina OD biolinistak biolina jotzen zuen
eta ez gitarra elektrikoa. SP publizistak, beraz,
gitarra elektrikoa jo eta errezitaldi amaieran
gitarra hondatu, apurtu edo sokak askatzeko
joera zuen birtuosoarekin mintzatzea nahiago zuen.
SP publizistak argi zeukan, gitarra elektrikoak
modu hartan hondatuta apurtzen zen bakarra
gitarra elektrikoa bera zela eta, akaso,
mesede ere egiten zitzaiela indar atzerakoien
eta gobernantzia mundialaren aldeko agenteei.
SP publizistak ez zuen txerrikirik erosi.
OD biolinistak ere ez zuen txerrikirik erosi.
© cc-by-sa Hedoi Etxarte