Imajina ezazu
Argia itzali dutela eta hondartza galdu batean zaudela
Arratsaren ertzean baga kalakariekin jolasten
Leiho-burdinarik gabeko gau librean
Ilargia itzal baten gainera datorrela
Imajina ezazu imajina
Adokin bustietan zure gorputzaren bila noala jolasti
Eskuak poltsikoetan sartuta
Eta gauean ene musu isilenak zure sabelean gorderik
Egilerik ezagutzen ez dugun abestia tartekatzen zaigula
Imajina ezazu imajina
Egunabarrean gure begiradek elkar aurkitzen dutela
Edo txolarreen aberrian erbesteraturik zaudela
Edo leihotik ikusten duzun zeru karratua arbel bilakatu dela
Eta hegazkinek marra ulergaitzak idazten dituztela
Imajina ezazu baina sarraila hotsa
Kartzelariak beste egun bat
Giltzatu duela adierazten dator
© Mikel Ibarguren