Erlojuen mekanika
Erlojuen mekanika
2007, poesia
96 orrialde
978-84-95511-99-7
azala: Xabier Gantzarain
Jose Luis Otamendi
1959, Azpeitia
 
2019, poesia
2014, poesia
2000, poesia
1999, narrazioak
1995, poesia
1990, poesia
1987, poesia
 

 

HILAK LAGUN

 

hildakoak sarri ez dira mintzo ulertzeko moduan

argi ozen eratsu

eta orduan —hoztu baino lehen—

harri zur eta alegiazko lubakietan

jartzen ditugu aldez dakizkigun

gure ondoan egin dezaten borroka edo

gure ordez bestela

 

gerla handi zein txikietan

izena ematera behartzen ditugu

lekua egiten diegu eztabaida eta desfiletan

gure ardailak eta hitzek zafratzen dituzte

tai gabe atzituak dira

atzenduak luze

eta beti eskaintzen dizkiegu ereserkiak gero

 

geuk nahi adina bider

hil eta arrapizten dira

berotzen digute bazkaria

lo kantak asmatu

zuhaitzak aldatzen dituzte zumardietan guretzat

eta zoriontsua dirudi euren isiltasun elurtuak

lurmendu gabe dagoenean

 

hildako apal eta asmo jaso bakoentzat

akigarria behar du

kausa zuzen eta okerraren kinkan

ulertzen ez zaien zapa-hizkera

moldakaizki ebaki batez

amets egiteak betierekoan

herri hilek bezala

 

hilek hauta balezate noren hildako izan

edo zeren alde...

baina hemen

ezin dute erretreta hartu ez ezer hautatu

ezin dira pausatu erabat

eurentzat su-etenik ez da indarrean...

biziak beste behar dira hilak neguko gordegietan