Erlojuen mekanika
Erlojuen mekanika
2007, poesia
96 orrialde
978-84-95511-99-7
azala: Xabier Gantzarain
Jose Luis Otamendi
1959, Azpeitia
 
2019, poesia
2014, poesia
2000, poesia
1999, narrazioak
1995, poesia
1990, poesia
1987, poesia
 

 

GERTABERRITZEA

 

teklatuaren memoria arakatu nahi izan dut

hatz mamietan taupadak igartzeko

grinaren ukenduaz osatu ditut

nire odolaren akorduan

zartatutako liburuak

merkataritza-ontzi bateko biztanle izateko

goraki esan nahi dut

mundu nahasi honetan

bizi den gizona naizela

(...egungo aristokratetarik)

 

letrak ere banaka paratu nahi ditut

elkarren babesean laineztu ez daitezen

uste ez dezaten ez direna badirenik

baina deblauki hitzak euren kodainarekin

kristalezko mendien gardentasunez

ebakitzen dira plaza librean:

zer egin handirik ez dagoela

ortzi urrun batetik jausi aerolitoen

mendeko sentitzen naiz

(...inoren zaurien kaligrafiak berritzen)

 

esan nahiko nuke memoria herbala dela

orain ezin bazaitut ukitu

pantaila berri batera joaten naiz

oroitzen zaitudanean

ez zure aztarnen bila

kate-erreakzioen beldurragatik baino

letra beharraz enpo

azken esaldiak eratzen zaizkit

halako batean poema-tranpa suerta dakidakeen aieruz

(...poesia federik gabe maite dut)