Erlojuen mekanika
Erlojuen mekanika
2007, poesia
96 orrialde
978-84-95511-99-7
azala: Xabier Gantzarain
Jose Luis Otamendi
1959, Azpeitia
 
2019, poesia
2014, poesia
2000, poesia
1999, narrazioak
1995, poesia
1990, poesia
1987, poesia
 

 

UDA HONDARRA

 

errezelak kenduko ditugu bi gelatan bihar

lorontziak hustu eta ohe estalkiak batu

armairuetan itxita utziko ditugu

asteotako kresala doinuak ardo mindua

aita-seme arteko haserreak

eta berri lazgarrien orban arrastoak

 

negute luzerako gertatu gara berriro:

agurtu ditugu auzoak

bahituran daramatzagu liburuetako

orri tarteetan hondar aleak

eta gauzei itsatsitako hezetasun ahaztezin hori

hezueria nostalgiko modu bat

 

ezki hosto gorrituek esan ahalko dute

itzultzeko asmoarekin partitu ginela

horrela utzita inork egiaztatu ezingo duen

errazkeria bilakatuko da datorren urtea:

leihoak zabaldu lizun usaina kendu pozari

kimu berriak adarretan...

 

maindirez estalitako altzaria ematen du gaur munduak

nekez onartzen dute autokritika nire sentimenduek:

galtze txarreko odola daukat