Erlojuen mekanika
Erlojuen mekanika
2007, poesia
96 orrialde
978-84-95511-99-7
azala: Xabier Gantzarain
Jose Luis Otamendi
1959, Azpeitia
 
2019, poesia
2014, poesia
2000, poesia
1999, narrazioak
1995, poesia
1990, poesia
1987, poesia
 

 

BESTE EGUZKI BAT

 

ez du zabaldu gaurko nahi genuen eguna

beste eguzki bat zutitu da haren partez

eta bart arratsean afaltzen jan genuen arrainak

hezur luze bi zituen gure eztarrira destatzen

beste leku batean egon nahiko nuke orain

pinudi ospel baten mugan

kamioiek zepa tontorrak

nola deskargatzen dituzten begira

beste herri batekoa nahiko nuke izan

beste jende batekin lan egin

eta bihotzeko zuloan dakardan liburuko

sanskrito modu hori tarteka ulertu

batzuetan maite dudan jendea

areago maite behar dudan jendearen

ordezkoa baino ez dela jabetzen naiz

eta neu ere

mezu ilaunak igortzen dizkidan

beste baten tokian nagoela hemen

 

ibiltzeari utzi zion harria naiz

goroldioa lotu zait kirioetan

sei ordu barru gaurkoa amaituko da eta

beste bulkada bat beharko da

igogailuen marruma atoian garraiatzeko

(hamarretik zortzik

mintzo garen hizkuntza

ulertzen ez duen herri batekoa naiz)