NON SUNT MULTIPLICANDA
ENTIA PRAETER NECESSITATEM
Horrela ezarri zuen behin betiko
finko
William Ockham-goa
fraide frantziskotarrak
Oxford-en eta Avignon-en
bere bizitza arriskutan jarrita,
ez baita egia
bide guztietatik hel gaitezkeenik
Erromara,
ez eta naturak
errepide akastunetatik
aurrera egiten duenik.
Horrela ezarri zuen behin betiko
finko
Ingalaterrako seme azkar hark,
independentzia maite izan zuena eta
udaberriko otea bezala,
hala berdetasunaren iturri diren
lanbroa eta nork bere modura
pentsatzeko manera.
Horrela ezarri zuen behin betiko
finko
gizajendea maite izan zuen
ingeles egoskorrak,
askatasuna baitzuen
Jainkoarengana hurreratzeko
bidezidor bakarra.
© Andolin Eguzkitza